بتاريخ الأحد 14 ديسمبر 2008
اجرى الحوار محيي الدين ابراهيم
عمري ماتوقعت هزيمة ونكسة زي هزيمة يونيو
انا عشت في السجون اكتر ماعشت مع ولادي
القذافي طلب مني امدحه قلت له ياعم ابعد عني
لماذا تفخر بلقب الفاجومي؟
"تصدق بقى إن الفاجومي" معناها " مغفل " ورغم كده بعتز باللقب ده؟!
تعتز بلقب " احمق " ؟
السادات اطلقه واستمر معايا وانا فخور به.
ولكنك من أذكى الشعراء فلماذا اطلقه عليك السادات؟
بسبب مشاغباتي السياسية معاه وكتر الاعتقالات .. انا كنت بخرج من المعتقل يامحيي عشان أدخله تاني.
ظاهرة الطبقة الجديدة كانت من الظواهر التي ميزت سنوات التحول الاشتراكي في مصر بعد ثورة يوليو، تفتكر بماذا الهمتك هذه الفترة؟
بأول قصايدي السياسية .. شوف يامحيي .. أي أزمة مرت بها مصر وعشتها ووعيتها .. كتبت عنها .. مش مهم النتيجة ايه .. اروح السجن .. أو اتحرق حتى .. المهم أعبر عن مشاعر اهل بلدي.
وما هي اهم الظروف؟
الظرف المهبب .. نكسة 67 .. الفساد ساعتها دبّ بدري بدري في جسد الاشتراكية الناصرية قبل النكسة بشهور فتنبأت بحجم الكارثة التي ستشهدها مصر .. الكلام ده كان في شهر ابريل أو مايو يمكن .. لكن عمري ماتوقعت هزيمة ونكسة زي هزيمة يونيو ابداً ..انا كنت اتمنى اموت قبل ماأشوف يوم اسود زي ده.
وكان تعبيرك ازاي؟
كتبت " يعيش اهل بلدي" وبعدها كتبت قصيدة "التحالف" وكنت بأسخر فيها من التحالف بين قوى الشعب العاملة.
وتحب تسمعنا ايه بقى " يعيش اهل بلدي " ام " التحالف؟
يعيش أهل بلــــــــــــــــــــدي
و بينهم مافيــــــــــــــــــــــش
تعارف يخلي التحالف يعيــش
تعيش كل طايفـــــــــــــــــــة
من الثانية خايفــــــــــــــــــــة
و تنزل ستاير بداير و شيـــش
لكن ف الموالــــــــــــــــــــــد
ياشعبي يا خالـــــــــــــــــــــد
بنتلم صحبـــــــــــــــــــــــــة
و نهتف يعيــــــــــــــــــــــش
يعيش أهل بلــــــــــــــــــــدي
يعيش المثقف على مقهى ريش
يعيش يعيــــــــــــــــــــــــــش
محفلط مزفلط كثير الكـــــلام
عديم الممارســــــــــــــــــــة
عدو الزحـــــــــــــــــــــــــام
بكام كلمة فاضيـــــــــــــــــة
و كام اصطـــــــــــــــــلاح
يفبرك حلول المشاكل قـــوام
يعيش المثقف يعيش يعيش يعيش
يعيش التنابلة ف حي الزمالك
و حي الزمالـــــــــــــــــــــــك
مسالك مسالــــــــــــــــــــــــك
تحاول تفكــــــــــــــــــــــــــر
تهوب هنالــــــــــــــــــــــــــك
تودر حياتــــــــــــــــــــــــــك
بلاش المهالـــــــــــــــــــــــك
لذلك إذا عزت توصف حياتهم
تقول الحياة عندنا مش كذلك
مش ممكن تشوفهـــــــــــــــم
ف وسط المدينــــــــــــــــــة
اذا مر جنبك اوتومبيل سفينة
قفاهم عجينــــــــــــــــــــــــة
كروشهم سمينـــــــــــــــــــــة
جلودهم بتضــــــــــــــــــوي
دماغهم تخينــــــــــــــــــــــة
سنانهم مبــــــــــــــــــــــــارد
تفوت ف الجليــــــــــــــــــــد
مفيش سخن بـــــــــــــــــــارد
بياكلوا الحديـــــــــــــــــــــــد
مدام نهر وارد
و جي م الصعيد
تزيد الموارد
كروشهم تزيد
و تسمع و تسلم
بان التنابلة أو الأكالين
حيسمح كبيرهم
و يعمل مقابلة مع الفلاحين
و يحصل تحالف مابين الجميع
و نملا المصارف
بدم القطيع
أطيع الخليفة
أطيع والديك
أطيع التنابلة
دا مفروض عليك
و تزرع و تبعت لحي الزمالك
و حي الزمالك
مسالك مسالك
تحاول تفكر تهوب هنالك
تودر حياتك
بلاش المهالك
لذلك اذا حد جاب لك سيرتهم
تبسمل تكبر
و تهتف كذلك
يعيش التنابلة
يعش يعيش يعش
يعيش أهل بلدي
يعيش الغلابة في طي النجوع
نهارهم سحابة
و ليلهم دموع
سواعد هزيلة
لكن فيها حيلة
تبدر تخدر جفاف الربوع
مكن شغل كايرو
ما يتبعش دايروه
لا ياكل و لا حتى يقدر يجوع
يا غلبان بلدنا
يا فلاح يا صاتع
يا شحم السواقي يا فحم المصانع
يا منتج يامبهج يا آخر حلاوة
يا هادي يا راخي ياعاقل ياقانع
ما تتعبش نفسك
ف شغل السياسة
و شوف انتشغلك
بهمة و حماسة
و عود عيالك فضيلة الرضا
لأن احنا طبعا عبيد القضا
و رزقك ورزقي و رزق الكلاب
دا موضوع مؤجل ليوم الحساب
كمان الصحافة حتكتب ف حالتك
و تنشر مناظر لخالك و خالتك
و تطلع يا مسعد عليك الغناوي
و تسمع باسمك ف قلب القهاوي
تحبك مشيرة و بنات الجزيرة
و قصة غرامك تشيع ف الرداوي
يعيش عم مسعد
يعيش يعيش يعيش
يعيش أهل بلدي
فعلاً كلام يدخل السجن ياعم نجم؟
انا عشت في السجون يابني اكتر ماعشت مع ولادي
طيب بعد هذه القصيدة ماذا كان رد الفعل؟
الدنيا ولعت .. خصوصاً بعد التصريح عن حشود عسكرية إسرائيلية على حدود سوريا، وبعدا باسبوع أو اتنين قامت الحرب وحصل اللي حصل.
قصدك النكسة؟
هو فيه غيرها .. النكسة كانت يوم 5 يونيو ويوم 8 يونيو كتبت " رسالة " وفي نفس اليوم كتبت " بقرة حاحا" وكنت ببكي فيها على مصر.
واه يا عبد الودود
يا رابض ع الحدود
و محافظ ع النظام
كيفك يا واد صحيح
عسى الله تكون مليح
و راجب للامام
أمك ع تدعي ليك
و ع تسلم عليك
و تجول بعد السلام
خليك ددع لابوك
ليجولوا منين دابوك
و يمصخوا الكلام
و الأهل يبلغوك
دميعا السلام
واه يا عبد الودود
كيفك و كيف زمايلك
عسى الله طيبين
خالك زناتي داي لك
ضمن المطوعين
و اختك تطلع يوماتي
ع المستشفى الجديمة
حاكم ع يمرنوها ف العركة
تكون حكيمة
و محمدين موافي
يتعلم المطافي
ويجولك شد عزمك
ويجولك العوافي
و آخر الكلام
نجولك في الختام
الله يصون بلدنا
و يحرص السلام
والدك حسن محارب
غفير برد الحمام
ولكن ماهي حكاية عبد المتعال؟
عبد المتعال هو عبد الودود .. ماهو أنا لما عرفت إن الجيش انهزم والمصيبة حلت .. وعبد الودود رجع لحدود قناة السويس للخلف در غيرت اسمه من عبد الودود الرابض على الحدود لعبد المتعال الرابض ع الكنال .. ماهو مابقاش فيه حدود يامحيي وكله مذلول ومهزوم.
انت شايف مصر النهاردة زي ماكنت شايفها قبل النكسة؟
لا .. مصر النهاردة بلد جامدة .. وزي ماقلت لك قبل كده .. الشارع المصري مرعب وطول التاريخ مرعب وقوي وصامد .. وشوف مصر النهاردة واسرائيل النهاردة .. هل مصر بتصرف مليارات عشان تبني حيطة حوالين القاهرة .. اسرائيل بتبني حيطة حوالين نفسها النهاردة لانها خايفة .. خايفة وبتكابر وبتقول جدار عازل.
هل هناك أي تغير حدث في شعر احمد فؤاد نجم النهاردة عن شعره في الستينيات؟
النقد أقل لأنني اكتسبت خبرة جعلت قصائدي أكثر هدوءا.
هل ترى السباب مباحا في الفن؟
كل شيء مباح لإيصال رسالة الفن طالما الرسالة مشروعة.
وهل مباح انك تقول للعقيد القذافي ابعد عني أحسن لك؟
هو مش بالظبط .. هي الحكاية ايه يامحيي .. هو طلب مني امدحه! .. بقى ده يصح؟؟ .. يطلب من شاعر رافض كل الأنظمة العربية انه يمدحه!! .. فقلت له: اكبر دعم تقدمه لي انك تفضل بعيد عني .. طيب انا سأحكي لك مصيبة حدثت لي في سوريا في عز زمن البطش:
ليست هناك تعليقات:
إرسال تعليق