بقلم: محيي الدين إبراهيم
طب تلاتة بالله العظيم من الحوض.. ابويا الله يرحمه كان بيقف على حوض المواعين 3 ساعات كل يوم يغسل صحون لحد ايده ماتتهري .. وامي .. ماهي واحدة ست وقادرة زي كل الستات .. كانت بتقعد تتفرج على التليفزيون!
هذه القصة اهديها الى:
الزوج الشهيد البطل: رضا عبد الموجود الحسيني ضحية الست نبوية ابو دراع !
الزوج الشهيد البطل: رمضان رافت الامبابي ضحية الست هنومة الجدع !
الزوج الشهيد البطل: تادرس جورج اسكندر ضحية الست نادية باسيلي الحمش !
الزوج الشهيد البطل: حامد سليمان ابو الروس ضحية الست فوقية الدكر !
كما اهديها لكل الازواج الشهداء الذين راحوا ضحايا النساء!
"إمضاء .. مشروع شهيد: حسين الدرمللي"
• انت راجل انت .. انت محصلتش وزة رومي حتى .. بشرفي لبكرة يطلعلك ريش وتمشي مفضوح في الشوارع .. والخمسة من عينتك بجنيه .. حد عاقل يسلم رقبته لواحدة ست يابني آدم ... تلاتة باللهي العظيم انت جرى لعقلك حاجة ... ده انت كدة تستحق جايزة نوفل للجنان ... ياراجل اعقل وامشي على تعاليم محمد عبد الوهاب في اغنية احب عيشة الحرية ... ستات!!!! ياخبر اسود ومنيل ... ربنا ياشيخ يجعل كلامنا خفيف عليهم ومايحوجناش ليهم ابدا قادر ياكريم ... ستات !! .. ستات يامغفل !! .. الله يرحمك ويحسن إليك.
• • رغم ان حسين الدرمللي وهو صديقي الوحيد منذ جيرة شارع بور سعيد بحي الابراهيمية بالاسكندرية .. وتربي في احضان اسرة رفيعة المستوى وطيبة السمعة ..الا انني لاادري من اين جاء بايمانه هذا الذي يعتقد فيه ان شقاء العالم بل وفكرة الشقاء نفسها هي في الاصل امراة .. سألته اكثر من مرة .. من اين اختلق هذه الافكار؟؟ .. لكنه كان مسكيناً للغاية لدرجة الاندهاش.
• دي حقيقة يامغفل .. وعايز تعرف الافكار دي جاية منين .. أقولك .. جاية من الحوض .. شفت .. شفت بدأت تتريق ازاي .. طب تلاتة بالله العظيم جاية من الحوض .. ابويا الله يرحمه كان بيقف على حوض المواعين 3 ساعات كل يوم يغسل صحون لحد ايده ماتتهري .. وامي .. ماهي واحدة ست وقادرة زي كل الستات .. كانت بتقعد تتفرج على التليفزيون .. تلاته باللهي العظيم انت اللي مسكين .. طب عمرك شفت واحدة ست ماتت قبل جوزها ؟ .. مستحيل .. اثبتت الاحصائيات .. ان نسبة وفيات الستات المتجوزة قبل اجوازهم ضعيفة جداً .. ( 1% ) .. تخيل واحد في المية نسبة الستات المتجوزة في العالم كله اللي بتموت قبل إجوازها .. عارف ده معناه إيه ؟؟ .. معناه ان 99% من اللى بيتكلوا على الله ويموتوا ويقابلوا وجه رب كريم هما الغلابة الازواج .. دي عملية إبادة جماعية للرجالة .. وبعدين انت عارف نسبة الواحد فالميه اللي بتموت فيها الستات المتجوزة قبل رجالتها بتحصل ليه ؟ .. ماهي ليها علة .. ليها سبب .. اقرا ياعم الخبر ده .. شوف .. آهو ياسيدي .. الستات اللواتي يمتن ناقصات عمر أغلبهن مطلقات أو أزواجهن مغتربون .. قلت حاجة من عندي !! .. أهو .. أغلبهن مطلقات أو أزواجهن مغتربون .. يعني لما مالقوش ( جوز ) جنبهم ينكدوا عليه ماتوا بحسرتهم ناقصين عمر .. اصل النكد بيطول عمر الستات .. اسألني انا .. النكد الإنثوي تكتيك .. استراتيجية .. حرب يامغفل حرب .. انفد بجلدك ياصاحبي واعقل .. برضه مش عايز تعقل ؟؟ .. يبقى الله يرحمك ويحسن اليك .. واللهي كنت صديق جدع .. ولعيب تنس مش ولابد .. وانا علشان الصحوبية والجيرة .. هقرا الفاتحة على روحك كل يوم العصر في النادي عند ملعب التنس .. ياراجل انت ماتعقل بقى .. تلاتة باللهي العظيم انت خلل .. بتنجان .. مغفل .. طب قوللي اعملك ايه .. صاحبي لكن مغفل .. الله ينكد عليك يابعيد .. لكن ينكد عليك إيه بقى .. ماهو نكد عليك خلاص .. مادام طبيت ياحلو .. ووقعت تحت ايد واحدة ست .. يبقى عليه العوض ومنه العوض خلاص .. الفاتحة على روحك !
• • لاادري ماهو العيب في ان اكون مجنوناً بحب "راندا الشنواني" اجمل فتاه في اسكندرية .. بل .. بل أجمل فتاة في الكون كله .. لست ادري لماذا يحاول حسين ان يقطع على وجداني كل الطرق في ان يتمتع بلحظات مطمئنة مع من يحب .. ما اجمل ان تحيا لحظة حب في ابتسامة امرأة تحبك وتحتويك .. إمرأة ليست كالنساء في عشقها .. إمرأة كأنك بها .. معها .. تحياً عمراً كاملاً بلا الم .. او حزن .. أو خوف .. مااروع ان تعيش وبداخلك معنى لأمرأة كمعنى "راندا الشنواني" .. معنى يحول جحيم الحياة والزحام الى فردوس وسكينة .. حيث تتمكن من الجمال ويتمكن منك الجمال في قبضة احساس واحدة .. قبضة تحولك الى كائن آخر .. طائر يحلق في سماء البهجة .. ويطير ولايرى من العالم الا جوانبه المشرقة فقط .. جوانبه التى تنطلق كالشمس من عين امرأة تعشقها وتحترمها وتحتويها .. من عين "راندا الشنواني".
• حيلك حيلك .. ايه هو ده .. انت ماصدقت واللا ايه .. مش قلت لك مجنون .. آديك اعترفت انك وقعت في دباديب راندا من ابتسامة .. طب بذمتك .. انا راضي ذمتك ياشيخ .. ورحمة ابوك الراجل الطيب اللي مات شهيد بسبب جوازه من أمك .. فيه واحدة ست وقعت في دباديب راجل ابتسم لها ؟ .. تلاته باللهي العظيم لو قعد يبتسم لها 10 سنين لتضربه بالشبشب وتسيبة وتمشي .. الرجالة اتهبلت واللا ايه ؟ .. إنت اتهبلت ياجدع انت؟؟ .. هو إيه اللي حصل للرجالة ؟؟ .. واحد يقع من رمش .. والتاني يقع من غمزة عين .. واللي يقع من رفع الحاجب رغم اني طول عمري بخاف من رفع الحواجب .. لأ والمصيبة ايه .. فيه رجالة بتقع لوحدها .. مجرد ماتيجي سيرة واحدة ست تلاقيه يسخسخ الحزين ويقع لوحده ...روح ياشيخ الله ينكد عليك.. آل نظرة عين تحولك من الزحام للفردوس .. احنا فين احنا .. في الاتوبيس .. تلاتة باللهي العظيم انت اتلحست خلاااااااص .. "راندا الشنواني" كلت دماغك وسحرت لك بعين العفريت وفاسوخ .. عملالك عمل سفلى نجس .. وكتبته على ضهر سمكة يتيمة مابتخلفش .. ورمتها في بحر ابو قير .. عشان تفضل طول عمرك بتريل وتجري وراها زي الدراويش ومجاذيب سيدي المرسي أبو العباس .. واللهي ياصاحبي انت كنت جدع .. انا عارف ايه اللي دهولك كدة يابعيد.. منك لله ياراندا يابنت الشنواني".
• • حسين لايعرف الحب .. مسكين .. انه اشبه بالفنار الخرب الذي انحسرت عنه المياه ففقد قيمته .. واصبح بلافائدة .. فلا هو يهدي سفناً تائهة .. ولاهو يصلح للسكنى .. لكن هذا لن يمنعني من ترتيبات الزواج براندا عروس الكون كله .. ملاك هذا العالم الجميل .. ووداعة النسيم البارد .. حينما يداعبك في ليلة صيف حارة .. وداعاً للحر .. ومرحباً بالزواج.
• تلاتة باللهي العظيم انت اللي بارد .. يابني آدم نابليون قالها حكمة .. ابحث عن المرأة .. وده معناه ان كل مصيبة لازم يكون وراها واحدة ست.. تعرف مين اللي في الصورة ده؟ .. ده الكابتن مصراوي لاعب الاسكواش المشهور .. ده كان عضو معانا هنا في نادي اسبورتنج .. شايف .. شاب زي الورد ازاي .. ياما نصحته مايتجوزش .. بعد سنتين جواز .. سنتين اتنين بس .. اعتزل الاسكواش واتفرغ لكتابة القصص والحكايات .. لأ ومش كدة وبس .. ده كان بيكتب مذكراته كمان .. وكان مسمي المذكرات دي مذكرات زوج سعيد جداً .. ضاعت منه مرة في النادي .. ولما ضاعت .. وقعت في إيد مدام ياسمين حرم القنصل عز الدين عثمان .. وما أدراك مدام ياسمين .. الياسمين كله .. دي بقى يامحترم .. صاحبة مرات الكابتن مصراوي الروح بالروح .. ربنا يشفيه بقى .. يارب اشفيه يارب .. غلبان وانت عارف يارب إنه غلبان .. بقاله 3 سنين في مستشفى جليم العام مابينطقش .. بيقولوا كوما .. غيبوبة يعني .. ياما نصحناه .. لكن كان دايماً راكب راسه زيك بالظبط.. عموما ياصاحبي انا هجيلك الفرح وهكون شايل معايا كحك وفطير زي اللي بنوزعهم في القرافة على روح الميتين .. ماهو يوم جوازك معناه انك مت وانت صغير وفي عز شبابك .. الله يرحمك ياصاحبي ويحسن اليك.
• • كانت ليلة زواجي براندا من اعظم ليالي الزواج في الاسكندرية .. لقد اقسمت ان اعلق الزينات من حي المنتزة حتى حي المنشية بطول الكورنيش .. كانت امنيتي ان يتحاكى اهل الثغر ومصر كلها عن سعادتي في الارتباط بحب عمري "راندا الشنواني" .. لم يحضر حسين الفرح بالطبع .. اكتفي ( النذل ) بارسال بوكيه ورد مكتوباً عليه " إنا لله وإنا اليه راجعون " .. لم اهتم بهذه الدعابة السخيفة .. أهتمامي كله لم يكن سوى في اتجاه راندا.. ماأروع ان يصالحك العالم .. أن تصالحك الدنيا .. أن تنال حظ البشر اجمعين في لحظة عشق ستدوم العمر كله... ماأنقى ان تشعر بأمتلاك العالم في لمسة انامل من تحب .. ما أروعك يارندا .. بحبك يارندا .. بحبك بحبك بحبككككككككك.
• انا ماخلصنيش اسيبك لوحدك في ليلة زي دي .. ماانا صاحبك برضه والعشرة ماتهونش الا على ولاد الحرام .. انا صممت اني انقلك في عربية الاسعاف هنا جنب مصراوي في عنبر المشوهين.. شايف ياولداه باصص في السقف ازاي .. أهو بقاله على الحال المهبب ده 3 سنين .. الدكاترة بتقول حالته بتتحسن وعينيه من خمس اسابيع بدأت تبربش .. آهو ده مثال حي للسعادة الزوجية .. عايز تقول حاجة يامصراوي ؟.. مش عايز .. طب ياخويا .. ربنا يخف عنك ياحبيبي .. آل مذكرات زوج سعيد آل .. ربنا يشفيك ياخويا .. ربنا يشفيك يامصراوي ويشفي كمان اللي راقد جنبك على السرير ياخويا .. جالك ايه بقى يامغفل من الجواز .. اهي راندا اتجوزتك اهي واللاخر قبل مايعدي اسبوع من الجواز فرمتك بسنانها زي العنكبوتة .. حد يرتبط بنمرة متوحشة .. الستات في طبعهم التوحش .. دي غريزة والغريزة غلابة .. بقى يارب اتنين زي الورد كانو اعضاء في نادي واحد ودلوقتي يبقوا اعضاء في عنبر واحد برضه .. لا ومش اي عنبر .. عنبر المشوهيين.
• • راندا خدعتني ياحسين .. ولازم مصراوي يفوق ويحط ايده في ايدي وإيدك عشان نرد كرامتنا ورجولتنا.
• رجولتنا ؟؟ .. رجولتك انت وهو ياخفيف .. أنا مازلت راجل عند مبدأي .. وبعدين قوللي هنا .. إنت هترد رجولتك إزاي ؟؟ .. ماكلتها قطط الجنس اللطيف يا بو مخ عجة وبطاطس مهروس .. أكلوها جبابرة العالم الحديث والمعاصر يارجل الكهف يامغفل .. بقولك ايه بقى بطل كلام خالص دلوقتي .. ولا نفس احسن ( الست ) الحكيمة جاية.
• • ست ؟!! ست بلاش ياحسين .. انا مش عايز اشوف ستات تاني خلاص .. انا بقيت اخاف منهم ياخويا .. بتستندل .. بتهرب وتجري ياحسين .. طب قبل ماتهرب وتسيبني معاها لوحدي كنت اعدلني ع القبلة واقرا على روحي الفاتحة ياخويا.
بقلم: محيي الدين ابراهيم أسماعيل
كاتب وإعلامي مصري
