بقلم: محيي الدين إبراهيم
شوف ياابن الناس .. انا نظرتي فيك مش هتخيب ابداً.. انت ياابني هتفضل طول عمرك حمار؟؟ .. خيبة ؟؟ .. لبخة ؟؟ .. إيه اللي خدته بقى لما اتعاملت مع كابتن مديحة باسلوبك الجلف ده؟؟ فريسة ايه يابني آدم وضحية إيه؟؟
* انا مش فاهم ازاي واحد في مكانتك ومركزك ويكلم واحدة ست بالفجاجة دي؟ حد يتعامل مع الستات كدة يابني آدم؟! طب ده انا لو لاقيت جيبة حريمي متعلقة ورا ضهر مكوجي هضرب لها تعظيم سلام وأدلعها واحترمها لمجرد انها حريمي .. انا مش فاهم هما عايزين يعينوك سفير نوايا حسنة على ايه؟ والمصيبة نوايا حسنة للأمومة والطفولة ! طب هي الامومة دي مش ستات ؟.. الله يخيبك ياشيخ .. انت ماتنفعش تبقى نوايا بلحة حتى .. حد يبقى عدو الستات يامغفل الا اذا كان مغفل.
كنت دائماً مأخرج من حواري مع عاصم السلحدار مهزوم هزيمة منكرة ، إذ لايدعك تتحدث اطلاقاً مادام قد امسك هو بلجام الحديث، فهو يطلق عليك تلميحاته اللاذعة واتهاماته الساخرة كما لو كان يحمل في فمه مدفع سريع الطلقات، السلحدار صديقي الوحيد، اثق به كثيراً واهجره احياناً حينما استشعر انه قد فهم تماما سلبياتي وحاول ان يعريها امامي، كلنا لانطيق ان يعرينا الاخرين امام انفسنا، لذا فنحن نهجرهم كاقصر الطرق للحلول حيث لانقوى على تغيير انفسنا للأصلح والاقوم بل وربما هاجمناهم في بعض الاحايين واتهمناهم بالعمالة والخيانة، انها عادة لايدمنها إلا الجهلاء واعلم اني جاهل لكن انكر ذلك بشدة حيث تأخذني العزة بالاثم فأدمن الجهل والغضب ظناً مني اني حكيم ومسالم.
* انت بقالك ساعة بتبص لي .. إية ؟ .. عمرك ماشفت ستات قبل كدة؟؟ .. دهشتك من كلامي بتلمح اني بتبلا عليك؟ اسمح لي انا اللي مندهشة من مراهقتك وعنيك اللي عمالة تلاحق كل البنات اللي على الترابيزات بشكل غير لايق بالمرة.. تقدر تقوللي فيه ايه بالظبط وبتبص لي كده ليه من ساعة ماقعدت؟
كانت جريئة جداً وثقتها في نفسها اكبر بكثير من احساسي بعمرها اذ كانت لاتتعدى الرابعة والعشرين من العمر.. لاانكر بالطبع اني كنت الاحق كل النساء الصغيرات بعيني ويبدو انها كانت ملاحقة ساذجة مني اذ احاول من خلالها ان اتعرف على سامية عبد الرحمن مراسلة التليفزيون العربي والتي لم اقابلها مرة واحدة في حياتي من قبل ولااعرف لها ملامح سوى انها ترتدي ( تي شيرت ) ازرق وتعلق على صدريته كارت صغير يحمل اسمها.. يبدو ان كل النساء هذا اليوم قد رغبن في ارتداء اللون الازرق .. انني لااحب اللون الازرق .. ولا احب هذا المأزق الذي اوقعني فيه مع هذه الفتاة الجريئة والمتحفزة.
* أول مرة أشوف حد مايعرفنيش... حد مايعرفش كابتن مديحة الكاشف اشهر لاعبة كاراتية في النادي... اسمح لي انت مش عايش في الدنيا.
رغم ان العبارة كانت تحمل كثيراً من معاني الغرور الا ان نبرة صوتها الهادئ لم توحي لي اطلاقاً بأنها مغرورة.. ولكنها اولا واخيرا امرأة وبالطبع لن تختلف عن بقية بنات جنسها في كونها امرأة وعليه لن اكون انا هذا الرجل الذي دائما مايصبح فريسة سهلة لاي انثى .. مااتعس الرجل .. انه تحت حكم امرأة منذ ان يولد وحتى يموت .. فأمة امرأة وحين يتحرر من سيطرتها تحكمة امرأة اخرى تحت مسمى زوجته وحين يتحرر من سيطرتها تحكمة امرأة ثالثة تحت مسمى ابنتة، حقاً مااتعسها من مسميات وماأشقى الرجل الذي يتوهم محبة أي امرأة له وهي في حقيقة الامر تحاول اثبات نظرية انها مرغوبة وجذابة لبنات جنسها ليس إلا، ان الرجل المسكين ليس سوى كوبري تعبر عليه المرأة بقدميها لتبين للعالم من حولها فقط انها انثى ولن اكون انا هذا الكوبري ابداً ماحييت.
* شوف ياابن الناس .. انا نظرتي فيك مش هتخيب ابداً.. انت ياابني هتفضل طول عمرك حمار؟؟ .. خيبة ؟؟ .. لبخة ؟؟ .. إيه اللي خدته بقى لما اتعاملت مع كابتن مديحة باسلوبك الجلف ده؟؟ فريسة ايه يابني آدم وضحية إيه؟؟ واللهي دي كانت المفروض تديك سيف يد تخنفك فيه مدام جاهل بامور الستات كدة؟؟ انا مش عارف ايه اللي مخليك قاعد في الاماكن الذواتي دي؟؟ انت ياصديقي العزيز المغفل .. ماليكش غير حارة قواوير .. سويقة اللا لا .. اسطبل عنتر .. هي دي الاماكن اللي بتلاقي فيها نفسك مش هليوبليس ونادي الشمس.. بقى مديحة الكاشف بونبوناية النادي تقوللها انتي مجنونة ؟؟؟ الله يخيبك يابعيد
كنت اشعر في قرارة نفسي بالفخر وأنني مازلت رجلاً حرأ لم ولن يقع فريسة امرأة ابداً وعليه لم اعبأ كثيراً بحوارات عاصم السلحدار اللاذعة وتهديدة لي بالمقاطعة بل وتغيير ارقام تليفوناته ايضا حتى لااتمكن من محادثته احتجاجاً على تصرفي العنيف مع مديحة، لم يكن امامي سوى ان اتصرف معها بهذا العنف فأنا لااجيد ان تحكمني امرأة ومن ثم فلتسقط مديحة الكاشف ولتبقى حريتي الى ان اموت.
* فيه ايه يابني آدم؟؟ .. جايبني على ملا وشي ليه ؟؟ .. لعلمك بقى انا ماجيتش ليك الا عشان العشرة اللي بينا والصحوبية القديمة من ايام المنيرة الابتدائية .. لكن غير كدة واللهي العظيم لكنت حالف اقاطعك العمر كله .. هو فيه ايه ؟؟ .. مابتتكلمش ليه؟؟؟ .. حد جراله حاجة يابني آدم ؟؟ .. اتكلم .. انطق .. انا عارف ان ابوك مات من عشر سنين .. ايه؟؟ .. مات تاني ؟؟ ماتتكلم بقى وغوشتني وانت شكلك زي الميتين كدة وماحلقتش بقالك سنة .. فيه ايه يابني ادم احسن واللهي العظيم اسيبك واقوم
* مديحة الكاشف ياعاصم
* .. مالها ؟؟ .. جرى لها حاجة؟؟ قول .. انطق .. اتكلم .. مالها مديحة؟
*اتجوزتني ..........................................
